„Önnur gerist nú atferð ungra manna“

Frá 2011 hefur verið unnið að því á Blönduósi að hanna og sauma frásagnarmyndverk á refil sem mun verða um 40 metra langur og um hálfur metri á breidd; byggist verkið á Vatnsdæla sögu hinni fornu. Fyrirmyndin er Bayeux-refillinn frægi. Verkið er viðamikið en mun vera vel á veg komið.

Það eru forn og ný sannindi að tímarnir breytast og mennirnir með. Og „unglingavandamálið“ er ekki nýtt af nálinni!

Í Vatnsdæla sögu hinni fornu segir Ketill raumur, norskur víkingur, við Þorstein son sinn:

Önnur gerist nú atferð ungra manna en þá er eg var ungur. Þá girntust menn á nokkur framaverk, annað tveggja að ráðast í hernað eða afla fjár og sóma með einhverjum aðferðum þeim er nokkur mannhætta var í. En nú vilja ungir menn gerast heimaelskir og sitja við bakelda og kýla vömb sína á miði og munngáti og þverr því karlmennska og harðfengi en eg hefi því fjár aflað og virðingar að eg þorði að leggja mig í hættu og hörð einvígi.

Umhugsunarefni!